الأربعاء، سبتمبر 12، 2012

بَسـْمِتـَك




بَسْمِتـَك إللي في شَفايفك
غـَابت كتير عن شفايفي
ألف عام أهرب وأدُور
وغُلب الدنيا يجري خَلـْفِي
كتير سنين راحت وجات
ماقلت يوم للحزن يـِكْفـِي
والأمل و ضيا التفاؤل
دول مغرمين بيا
عايشين في حضني وكَنَفي
إِِضْحك و صَهْلَل بلاها غـَم
أتْمَنىَ يوم في الهَم
ما تِبْقىَ خَلـَفي
بسمتك نور للدنيا حواليا
وشمعة تحارب ضلام كَهْفـِي
مافيش طريق
بدون نَوَايـِب تِمْرِضَك
لكن هناك اللي كمان يـِشْفي
ما تِنـَمْش تبكي نـَكْبـِتك
أو تنتحب وتقول دا رغم أنفي
إنهض عليها تتمحي
وقول دا انا زي الحديد كفي
لن تتلوي في يوم لظالم
أو تفتري على اللي طلب عطفي
قلبي بحور للحب
وتشيل هموم زي الجبال كتفي
دول مش يومين راح ينقضوا
ونقول آمين على الحزين منها
أو يدوي على مُبْهـِجْهَا سَقـْفِي
اللي فات ما عمره مات
ولا الزمان راح يواري ويِخْفِي
دا له أثر باقـي
في شجاعتي ومخاوفي
والعـُمر إيــه
غير اللي مر وشفته
واللي جــاي
ورا ستار الغيب مَخْفـِي.
..
...
دي صورة زياد إبن اختي،إمبارح وقع من على السلالم وخده اليمين إتجرح وعنيه ورمت،فقلت أخلد ذكرى خدوده بدون تشويه!

هناك 8 تعليقات:

  1. صباح الغاردينيا احمد
    وأجمل صباح يبدأ بحروفك فمن غزل البارحة
    إلى حنان اليوم فما أروع صباح طفولي
    داعب الحنان في صدري فقرأت في عيني زياد
    أجمل القصائد وأعذب الكلمات ..
    بسم الله ماشاء الله تبارك الرحمن :)
    لاحرمك الله أبتسامته وضحكة عيناه "
    ؛؛
    ؛
    اممم ممكن بعد أذنك تبوس لي زياد
    قوله طنط ريماس بتقولك أنت عسول اوي
    بجد بجد هو عسول ويتحب ربنا يحميه
    وألف ألف سلامة عليه شد حيلك ياخالو احمد
    وهات له أنت وخالتو رحاب أجمل هديه
    اممم وكمان هاتو هديه بأسمي :)"
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  2. أولا: الف سلامه على زياد ربنا يشفيه ويعافيه ويحفظه لمامته وباباه
    ثانيا : بجد كتاباتك المليئه بالتفاؤل بتخلى اليوم جميل
    ثالثا : دائما ما ارى البراءة فى عيون طفل وما اجمل البراءة فى عيون زياد .
    دمت مبدعا صديقى العزيز ( وخلى بالك من زياد وعقبال ما تشوف اولادك )
    تحياتى

    ردحذف
  3. ألف سلامة عليه .. أمور ما شاء الله و بكرة يخف و يرجع زي ما كان

    عن القصيدة ..
    تسلم إيدك ، متألق زي العادة
    و طول ما فيه حياة دايما لازم يبقى أمل و شجاعة عشان نتحمل مستقبلنا ( المظلم للأسف )

    و أتمنى إن اللي جايين بعدنا يبقى رؤيتهم لمستقبلهم أحسن مننا
    بس أهم حاجة لازم يتعلمها كل إنسان .. إنه يتمسك بالأمل لآخر نفس

    تحياتي و سلامي

    ردحذف
  4. الف سلامه عليه الاطفال ياما بيتعرضوا لجروح لكن سبحان الله لازم ينسوا ويقوموا يلعبوا تانى
    وان شاء الله يكون احسن

    جميله كلماتك
    يؤثرونا بتلك الابتسامه


    دمت بخير

    ردحذف

  5. القمر ده وقع
    ما شاء الله عليه زى السكر
    ألف سلامة عليه
    ربنا يشفيه ويحميه يارب


    الصراحة كتاباتك اللى قرأتها دلوقتى ورا بعض كلها مليانة تفاؤل وأمل .. فرحتنى أوى .. ده غير صورة زياد وابتسامته الجميلة اللى مليانة براءة

    يووووه بقى
    كده مش هخلص معاكسة الولد العسل ده
    بص يا أحمد أنا خطبته خلاص وهتجوزه بالعافية
    وخلى بالك لو عاوز تتجوز أم سحلول يبقى لازم تقنع زياد انه يتجوزنى ومش يقلق خالص هستناه لما يكبر ، هو أنا ورايا حاجة !

    ردحذف
  6. ما شاء اله علي القمر
    ربنا يبارك فيه
    والف سلامه عليه ربنا يشفيه يارب

    ردحذف
  7. بالمناسبه الف سلامه علي الفلسفه دي والله زعلت اوي

    ردحذف
  8. ربنا يشفي زياد الجميل اللي كله نشاط وبسمته تملأ الكون بهجة وفرح
    أسأل الله العظيم رب العرش العظيم أن يشفيك /
    مساء النور أستاذ أحمد أأسف لتأخري ان شاء الله يكون قد شفي الطفل وشكرا لكلامك الجميل
    تحيتي واحترامي .

    ردحذف

فضفض و قول اللي في ضميرك
مشتاق صديقك لأي قول