الجمعة، سبتمبر 23، 2016

صبـَـاح



يهل الصبح وانتِ الضي وانتِ النور
وانتِ النسمة هيمانة شذاها عطور
وانت أميرة كل الحسـن زيـِّـــنها
اذا ابتسمت شفايفها يغاروا الحور
            
يهل الصبح وانتِ البادي والمستور
وانتِ الفكرة مشروحة بألف شعور
وانتِ الرؤية لو صعبت على عيني
وانتِ الخصب يا جنة لأرضي البور

يهل الصبح وانتِ قصيدة من بلور
يبني خيالي بأبياتها جنان وقصور
أوزانها نـَغـَم للطـِير في تباريحـــه
وتقاسيمه على نبضاتي ليها شُطور


يهل الصبح والمخلوق في أمره أمور
فيهم هيمان فيهم كسلان فيهم مكْسور
فيهم مربوط بأفكاره وأسراره وأدواره
بيلقاها كدة تشدة لأسفل غـُور

يهل الصبح والمُرْعِب كدة منشور
وانا اللي بيكي جوايا بقلب جسور
فكوني الصبح بعد ضلامي يا غالية
لما الدايرة يوم تيجي عليا تدور
..

هناك 3 تعليقات:

  1. عاش من شافك بتكتب تاني

    ردحذف
  2. حمد الله على السلامة
    وحشتنا كلماتك واشعارك صديقى ودمت متألقا
    تحياتى

    ردحذف

فضفض و قول اللي في ضميرك
مشتاق صديقك لأي قول