الاثنين، سبتمبر 17، 2012

نِفْسـِـي


نفســــي أحس
إنك بخير يا بلـــدي
أنا أصلي شايف
فـَرْح الشفايــف
وراه من الغـُلب
ما يهري قلبي وكبدي
كـــام أب قال كله تمـــام
ما تشيلش هـَـم يا ولـــدي
هيص وعيش دي القاشية معدن
بسمة شفايفك بالدنيا عنــدي
عِـزة خطوتك وسمو هامتك
وتـُوب جميل يبرز وسامتك
هـُـمَّا في وقت الشدة
دعمــي وسنـــدي
إزاي أشوفك في يوم كسير
وأنا عشت عمـــري
أداري حزني ونكـــدي
أبان كأني عنتر زماني
والعجز شالل روحي ويدي
أقول المعدة من التخمة باظت
وجفاف ضلوعي من جوعي يعدي
حمَّال هموم وكل يوم
أضحك وأقول يا كُتر سعدي
مستني يوم تِجْلـِي عيونك
وتشوف بقلبك
انا أد إية تعبت سواعدي
مش منتظر شكر وقصايد
على اللي فات وهد عضدي
ولا حروب ونار معارك
عشان تعيد للدنيا مجدي
طمني بس وقولي
عشان افخر وأغني
وأقـــول
ما راح بلاش عرقي وكدي
هتقدر يا ولدي تكمل المشوار
وتشيل الحمل من بعدي؟!
..
نفسي أحس
إنك بخير يا بلدي
وانا فوق جبينك شايف
من الأحزان
ما يقتل المهجة
ويسيل الدمع فوق خدي
كتير حكالي عن المرجلة جدي
خط في كيانــي
إزاي أسير على الحق دربي
إزاي أكون أسد جسور
لو كل من في الكون
انقلبوا ضــدي
إزاي أعيش حياتي فرحة
لو خوفوني بالعزلة وحدي
إزاي ما ابعش بالبخس حلمي
لو ما شبع جلادي من جلدي
إزاي لساني ينطق بقولي
مش قول لسيد
يرضيه يقول شاطر يا عبدي
لمين وفين وبكل رغبة
تسيل دمايا وبروحي أفدي
دي اللحظة لو فاتت
وكنت فيها محنية هامتي
ما اقدرأمحيها
أو أقــول لها
من عمري ما تتعدي
وأنا أبقى إية
لو خنت مع نفسي عهدي
هي الحياة تنفع حياة
لو عشتها على عكس ودي؟!
..
...

هناك 6 تعليقات:

  1. بديعة
    :-))
    سلمت الأيادي

    تقبل مروري

    ردحذف
  2. نفسنا نشوف بلدنا احلى يا احمد والله
    قلبت عليه مواجعى بكلماتك
    لكن بجد انت مبدع
    تقبل تحياتى صديقى العزيز

    ردحذف
  3. كلنا نفسنا
    ربنا يصلح الاحوال
    جميله جدا
    تحياتي

    ردحذف
  4. ان شاء الله بخير
    جميلة يا احمد

    ردحذف
  5. الله ينور جميلة مشاء الله

    ردحذف
  6. صباح الغاردينيا احمد
    وسترى مصر بخير بإذن الله
    وستكون آجمل "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف

فضفض و قول اللي في ضميرك
مشتاق صديقك لأي قول