الأربعاء، يوليو 04، 2012

أنا المرسوم جواه !!




    أسف على الإطالة و حبيت أقولها في الأول، ومش هازعل من اللي مش هيقرأ لأني عارف إن ما حدش عنده وقت!!

أنا شخص يعرف نفسه جيدا و لكن يصعب عليه تعريفها،أحيانا الجأ لمن يَعْرِفنِي ليُعَرّفنِي ، و أتابع كلامه و عندما يقول ما هو صحيح أدعه يستمر وأبتسم و انا اسمع، و عندما يخطئ أوقفه و أصحح له !!
وانا في ابتدائي كنت بأحب العب كرة قدم،زي كل الولاد، ولكن و لأني ما كنتش بأعرف ألعب فكانوا بيوقفوني حارس مرمى !! لكن أما دخلت الثانوي اكتشفت اني محترف كرة طائرة وكانوا كلهم بيتخانقوا على مين يضمني لفريقه..كلهم عاوزني..سبحان مغير الأحوال !!..و ده كان درس ليا..بس واضح اني ما اتعلمتش منه !
...
أشكر الاستاذة أية محمد على الفكرة
نبدأ الإجابات



1/ عرف نفسك ؟
أحمد أحمد أحمد صالح
27 سنة 5 شهور 5 أيام
فــلاح،بس مودرن شوية،يعني ميمي في مطب صناعي مش محمد أبوسويلم في الأرض !
..اذا كنت هأتكلم عن التعليم بمبدأ ذِكر السنوات اللي اتعلمت فيها فأنا معايا ابتدائية،لأن العشتاشر سنة اللي بعد الابتدائي ما اتعلمتش فيهم حاجة..
 أعزب و ربنا يكرمني ببنت الحلال

2/ ما أكثر ما يميز شخصيتك ؟
دايما بأداوي جروحي بالأفكار لأني أخطأت في حق نفسي كتير جدا،و كان أهم هذه الأخطاء هو اختراعي لمبدأ : عقليتي ان لم توصلني لنجاحي فستبرر لي فشلي !!
ولكن لأني كان ممكن أنتحر لما الاقيني في صحرا و مكان انا اللي وصلت نفسي ليه بكسلي، قدرت أداوي نفسي بالأفكار،يعني ما قدرتش أحب شغلي تطبيقا لمبدأ حب ما تعمل حتى تعمل ما تحب،و لكني قدرت اؤمن و أطبق فكرة كن عظيم و رائع و محترف في عملك الذي تكرهه،و الحمد لله أنا -أعتقد يعني- كويس في شغلي اللي بأكرهه !
كان الكل بيمدح فيا ثقافتي و ذكائي من و انا في ابتدائي،اتغريت،كان عندي ثقافة و ذكاء لكن كان ينقصني الوعي بالقيمة الحقيقية لما أملك،و فكرة أنك حر في تحديد مصير مستقبلك فتقبل بالحضيض فهذه حياتك فقد اكتشفت أن والديا لهم حق في أن يسعدوا بما انا فيه و لأن يكونوا فخورين بما أنا فيه..فلماذا حرمتهم من ذلك ؟ 
تمردت بشكل خاطئ،و صلت لليوم اللي خالي منير- و كان مدرسي في ابتدائي و كان باني عليا أمال كتيرة-قال لي فيه : بقى دينا الغبية تدخل طب و انت ما تدخلش حاجة خالص !!
- كسول جدا،رغم ان الايام بتثبت لي العكس بس مش مصدق!
- لا أفكر إلا بالاستفزاز،استفزني خد مني أحلى كلام !! ولا استطيع التعبير بالكتابة بقدر ما استطيع التعبير بالكلام.
- اتضح لي من شغلي في الصحراء أن صبري ليس له حدود ، وأن العصبية ليست مرض أبدي فأنا عصبي و لكن المسئولية علمتني بكل حرفية كيف أتمالك أعصابي بدون كبت بل بالعقل.
- أعتقد أني على قدر المسئولية، وشغلي بيثبت ده
-.لا اتعلم الشئ الا لحاجة و لكن عندما اشبع هذه الحاجة لا استمر !! يعني مثلا حبيت مقطع :
Mädchen aus Ost-Berlin
das war wirklich schwer
ich musste gehn, obwohl ich so gerne noch geblieben wär
 من أغنية أودو ليندينبرج  wir wollen doch einfach nur zusammen sein
فبدأت أتعلم ألماني، وبعد ما اجدته بالشكل اللي يخليني أفهم و اعيش الاغنية بشكل كويس بطلت ألماني !!

- غريب شوية، يعني فلاح و بأصيف في شرم !
- نظرتي للدنيا اختلفت، يعني كان نفسي أشتري كاميرا نيكون بس ما كانش معايا فلوس، وكان نفسي أشتري لاب توب بس ما كانش معايا فلوس،دلوقت ممكن أقدر أشتري الاتنين لكن مش هأشتريهم لأني بدأت أفكر بأسلوب تاني، حالة الحرمان من الدرجة التانية، حالة الحرمان من الدرجة الاولى انك تكون محتاج و لكنك لا تملك اي شئ، اما حالة الحرمان من الدرجة التانية فهي انك يكون نفسك في الحاجة و معاك فلوس بس الفلوس دي محتاجها في شئ أهم، و هي دي حالتي..بدل ما اشتري لاب توب بـ 3 أو 4 الاف جنيه ،لأ أشتري بالفلوس دي شوية طوب أو شوية أسمنت عشان أكمل الشقة !! وكله من ده !!

..اذا كان ما ذكرته مميزات فعيوبي بالجملة ولكم ان تتخيلوها 

3/ ما هى اهم نقطة تحول فى حياتك ؟
قراري بعدم اكمال دراستي بعد الثانوية العامة و الخروج للعمل 

4/ كيف دخلت الى عالم التدوين ؟
 كنت بأقرأ عن المدونات و المدونيين في جريد الدستور،عجبني الموضوع،وأنشات مدونتي في أكتوبر 2007 ، ولكن لأني كنت لا أملك كمبيوتر و لا وصلة نت فكنت أجد صعوبة في التدوين،و أيضا لأني بعد ما انشأتها سافرت و ما كنش في فرصة أكتب،فأهملتها السنين دي كلها، لكن السنة دي لما و صلتني الدعوة من الدكتورة شيرين سامي للتدوين اليومي،و من تشجيع رحاب اختي ليا،و لأني مأجز في البيت فترة قررت فتحها مرة أخرى و محاول التفاعل مع هذا العالم مرة أخرى..و طبعا كان ده اجمل شئ عملته لأسباب سيتم ذكرها لاحقا

5/ ما اسم مدونتك ولماذا اخترته ؟
 اسم المدونة وجع الفلسفة
كان إسم المدونة عندما أنشأتها ( بُرلسي) نسبة لبلدي البرلس لكني غيرت أسمها لوجع الفلسفة،و يمكن قلت لية و ازاي جالي الاسم في أول تدوينة بالأسم الجديد-، انا عاشق للسينما-رغم اني تقريبا ما دخلتهاش !!..عاشق لفن السينما للمشهد و الجملة و الحوار الجميل، في فيلم البيضة و الحجر مشهد بين أحمد زكي و معالي زايد،راحت له عشان يفك العمل الي معمول لها و مدفون تحت ظفر نملة و بيخلي الرجالة يشوفوها قرد !!
وقال لها انه بيحضر دكتوراه في الفلسفة، فسألته :
الا قولي يا مولانا،هي الفلسفة في أنهي حتة في الجسم ؟
يعني لو فلسفتي و جعتني أروح لأنهي دكتور ؟
..من هنا جاء اسم وجع الفلسفة

 أما لماذا أخترته فلأنه تقريبا هو ما كنت أبحث عنه
فإذا كانت الفلسفة هي خلاصة الفكر الانساني ،و اذا كنا نعاني الان أزمة في التفكير و العقليات و ما تنتجه من أفكار يرتكن اليها بعدها أفعال قد تسبب لنا العصبية أو الجنون أو الوجع ،فهذا هو وجع الفلسفة و جع العقل أمام الجنون وجع المنطق أمام اللامنطق،و جع الاسنقامة أمام الاعوجاج  وجع المسئولية أمام الاهمال ،وجع الاهتمام أمام اللامبالاة....إنها الافكار التي لا تأبى أن تمر إلا و قد وجعت و ألمت فلسفتك !!

6/ صف مدونتك ؟
 ما يصحش !!

7/ من هم أكثر ثلاث شخصيات أثروا بك من داخل عالم التدوين ؟ ومن خارجه ؟
فوق الجميع طبعا قدوتنا جميعا،محمد صلى الله عليه وسلم 
...
في عالم التدوين صعب جدا أحدد 3 شخصيات لأنهم صراحة بالعشرات وأشعر بمدى صغري أمام قمة و روعة أفكارهم و كتاباتهم،و مع حفظ الالقاب و الترتيب سأبدأ بـ 
- نورهان محمود و مدونتها (عبث ) و هي في الحقيقة قمة العقل و المنطق !
- مصطفى سيف و مدونة طير الرماد،دوما اجد عنده ما يبهرني،و اجد منه عندي ما يشجعني و يحفزني 
- شيرين سامي و مدونتها حدوتة مصرية،بعيدا عن روعة كتابتها فهي صاحبة الفضل الأول في وجودي هنا
- ايمان بلعباس و مدونتها دقات قلب، قمة و روعة الفكر و الاسلوب،
- عمرو يسري و مدونته فضفضة،دايما بيحسسني اني نجيب محفوظ أو ماركيز !! شكرا على دعمك القوي يا عمرو
- سلمى فتحي و مدونتها افرد جناحك،بحس مع أفكارها الرائعة اني بأطير، و تشجعها عمري أبدا ما هأوفي له حقه
- مروة زهران و مدونتها لحظات تأمل، أعجز دوما عن التعيبر عن مدى روعة و جمال ما تكتبه
- تامر نبيل و مدونته أفكار حرة،واشعارن الرائعة
- كريمة سندي و مدونتها اقصوصة، و ما نتعلمه منها يوميا
-سهير القاسم و مدونتها نيسااان،و اي متعة و استفادة من قراءة كلماتها
- مها الخضراوي و مدونتها أفكار حرة،و افكارها الرائعة
- فاطمة وهيدي و مدونتها تقاسيم عى وتر الشوق،بروعة ما تنشره 
- أسامة ناصر ،بأفكاره الجميلة و اسلوبه الرائع
- رحاب أختي و مدونتها حياتي لكن مش حرة فيها،و رقة وطفولية اسلوبها
- منة سيد و مدونتها فراولة،و الروح الجميلة لها و روعتها
- زينة زيدان و روعة ما تكتبه
- ضياء عزت في بيبان، و أفكاره الجميلة جدا
- رؤى عليوة و روعة وجمال ما تكتب
- شريف الصفتي و أفكاره  الرائعة و اسلوبه الجميل
...القائمة طويلة جدا و أسف جدا لمن لم أذكرهم و لكني والله أحترمهم جميعا
..
أما من خارج عالم التدوين،و بعيد عن الكتاب و الفلاسفة و الشعراء الخ
- أبي تناقضاته العجيبة و امي بطيبتها الفظيعة !
- خالي منير،أبونا كلنا زي ما بنسميه احنا ولاد أخواته البنات، لأنه دايما موجود، في الافراح و في الاحزان..في أسعد الأوقات و في أحلكها ظلمة
- صديقي الشاعر العراقي رياض شلال المحمدي،علمني معنى أن تكون عظيم و تشعر من حولك أنهم عظماء،علمني التواضع فهو لا يقل عبقرية أو مكانة عن الجواهري أو احمد شوقي و دوما يمدح أبياتي المكسورة و التي لا يتعدى عددها اصابع اليد الواحدة..

8/ ما هى طقوسك الخاصة عند الكتابة ؟
 ليس لدي طقوس،بظروفها

9/ ما هو الاسلوب المفضل لديك فى التدوين ؟
 أنا دايما اسلوبي مباشر و معظم الفكرة بأحاول أوصلها من خلال الحوار أو السرد البسيط وبأسيب مساحة للقارئ ليأخذ ما يعجبه و يترك لي مالا يريده !

10/ فى رأيك ما أهم ما يميز تدويناتك ؟
 انها لهاوي و ليست لمحترف !!

11/ ما هو تقيمك لعالم التدوين فى الفترة الاخيرة ؟
السؤال ده صيغته جاءت جميلة جدا فأغلبنا - أو على الأقل انا - لم ندخل أو نرجع لعالم التدوين الا من خلال هذه الدعوة للتدوين اليومي،ويسعدني ما اراه رغم ان البعض يقول انه ضعيف،و لكني فقط اريد المزيد من التفاعل مع التدوينات من خلال التعليقات و النقاشات..و انوه الى اننا اسعد حظا من الاجيال التي سبقتنا،و ان كنت اظن أن منهم عبقريات قد دفنت،فمساحة و وسائل التعبير متاحة لنا  بشكل كبير جدا جدا.

12/ اختر اقرب تدويناتك الى نفسك وضع رابطها وحدثنا عنها ؟
...مش هأقدر أقول ان كلهم أبنائي فأنا أو ابني الوحيد فيهم هي هذه التدوينة :

و اظنني تشوقت لي فلم أعد أحلم و لم أعد حتى أتسلق الهضاب و ليس السحاب !!

13/ استعرض اهم المواقف الغريبة او الطريفة التى صادفتك مع التدوين ؟
ما اظنش ان لي مواقف..الا بقى أما ادخل و الاقي رحاب اختي شغالة تعليق بالحساب بتاعي عشان مكسلة تدخل الحساب بتاعها !

14/ هل أحدث التدوين تأثيرا عليك ؟ وكيف ؟
تأثير كبير جدا جدا جدا،اما ما هو وكيف فهذا يحتاج لتدوينة !

15/ اختر اى مدون ووجه له سؤال ؟
رغم انه صعب، ونفسي أسأل مدونين كتير..فأنا هأوجه سؤالي للمدونين اللي أصدروا كتب، و اقول لهم ،هل احساسكم بالسعادة من مدح أو اعجاب الناس اللي زي حالتنا اختلف من قبل لبعد اصدار كتبكم ؟ و نفس الوضع مع النقد لو واحد زيي نقدكم و انتم أصحاب كتب منشورة بتضايقوا؟
..
تمت بحمد الله !!

هناك 43 تعليقًا:

  1. هو أنا ممكن أصقف الأول :)
    ممكن مش كده :)

    و الله يا أحمد أنا فعلاً سعيده بالتعرف على مدونتك و كتاباتك بجد أكتر من روعه أنا بحاول أتابعها كلها حتى لو مش بعلق..إنت موهوب فعلاً و كان لازم تدون من زمان بس ملحوقه :)
    إنت فاجئتني إنهارده بشخصيتك و ظروفك اللي محاولتش إنك تجملها و نقلتها زي ما هي..عشان إنت إنسان واق من نفسه و من ثقافته و قدراته حتى لو ده مظهرش.
    أنا مش عايزاك تشكرني عشان أنا اللي بشكرك إنك هنا بينا في البلوجر لأنك بالفعل أضفت له الكثييير و أنا و أعتقد معظم المشتركين في حملة التدوين اليومي لامسين إبداعك و تميزك.

    بالنسبة للسؤال الأخير

    عن نفسي ماحسيتش بأي فرق قبل و بعد النشر في إحساسي بالتعليقات سواء نقد أو مدح..هو المدح دائماً أكتر لكن أنا عارفه إن ده راجع لطبيعتنا المجامله..لكن أنا بشتاق إن حد ينقدني و بنتظر ده..
    و أنا إتغسلت نقد في ندواتي :) يعني عادي أكيد لازم نتقبل عشان نتعلم..على فكرة اللي نشر ميفرقش أي حاجه عن اللي مانشرش غير إن جاتله فرصة.

    بإختصار إنت موهوب و أنا سعيده بعودتك للتدوين و أتمنى تمتعنا أكتر بكتاباتك.
    مش عايزه أجيب سيرة رحاب عشان أنا متابعاك عشان كتاباتك إنت..لكن هي طبعاً من أقرب المدونات لقلبي و هي عارفه :)

    بتمنى لك كل التوفيق و النجاح

    ردحذف
  2. عايزه أقولك حاجه في التنسيق
    يا ريت لو تغير لو خط الكتابه أصل الخط الأحمر مع الخلفية البينك مش لايق و غالباً الأحمر بيستخدم في الـ key words أو الكلمات المؤثره اللي عايز تصرخ و إنت بتقولها..مجرد رأي و إنت حُر طبعاً :)

    تحياتي

    ردحذف
    الردود
    1. دكتورة شيرين،أشكرك على كلماتك الجميلة و التي أعتز بها جدا، وسعدت و تشرفت بوجودك جدا..رغم اني بأحب اللون الأحمر في الكتابة ، حتى اني عندما اكتب على الورق أكتب باللون الأحمر، الا أنني سأراعي التنسيق في الالوان في التدوينات القادمة..تحياتي و احترامي

      حذف
  3. فخورة بيك إنك فخور بنفسك
    و صادق
    و كتاباتك أحلى

    ردحذف
    الردود
    1. أشكرك استاذة سحر على كلماتك الجميلة التي أسعدتني جدا، و على زيارتك التي اسعدتني و شرفتني جدا..تحياتي

      حذف
  4. أستاذاحمد
    عايز اقولك غني فعلا بستمتع جدا بزيارة مدونتك.. كمان على المستوى الإنساني عندي راحة نفسية من ناحيتك .. من الناس اللي ممكن احس انهم قريبين مني :)
    ودي حاجة بتاعة ربنا

    أسلوبك هنا عجبني كالعادة عندك شوية تعريف للاشياء تحفة بينم عن خبرة وثقافة وفلسفة

    فيلم البيضة والحجر بعشق الحوار فيه زيك وزيك بحب السينما أوي برضه D:..

    شرف ليا حقيقي إنك تحط اسمي مقرون بالكلام الجميل ده ..

    ربنا يخليك

    ويارب دايما متوفق وناجح في حياتك ..

    أما بنت الحلال .. فندور عليها سوا بقى D:

    ردحذف
    الردود
    1. أستاذ ضياء،أسعدتني جدا جدا كلماتك،و الأكيد أن هذه الراحة و هذا الاحساس متبادل،و الشرف و السعادة لي بوجودك هنا و بزيارتك لمدونتي ،و الاكيد انني لم اوافيك حقك من الكلام و الوصف..و ربنا يرزقنا كلنا ببنت الحلال الي نقدر نسعدها و تقدر تسعدنا..محبتي و تحياتي

      حذف
  5. ازيك يا فندم :)
    اول المفاجات طبعا اللي مش كنت اعرفها وعرفتها الصبح انك اخو رحاب وانا بحب مدوناتكم انتم الاتنين فعلا بس كل واحد منكم لسبب
    رحاب بلاقي ديما فيها حتة مني بتقول حاجة انا عاوزة اقولها
    انت بقى بحس كده اننا قاعدين انا واصحابي ايام المدرسة في الملعب على الارض وعمالين نرغي كده وناخد وندي بندردش سوا سوا يعني ودي حاجة بتفرحني والله وبتحسسني بالفة مع المدونة والكلام اللي فيها
    مبسوطة اني عرفتك اكتر وربنا يديم المعرفة في الخير ان شاء الله

    ردحذف
  6. نسيت اقولك اني فرحت اوي لما لاقيت اسمي مكتوب
    انا اسمي قريته 3 مرات النهاردة عند ناس انا بحترمهم اوي اد ايه دي حاجة فرحتني واكيد انك حد منهم دي حاجة شرفتني اكتر :)

    ردحذف
    الردود
    1. أشكرك جدا يا باشمهندسة،على كلماتك الجميلة التي اسعدتني جدا،و اتمنى ان تنال كتاباتي دوما اعجابك و قبولك،و االأكيد ان كلماتي لم و لن توفيك قدرك الذي تستحقينه..تشرفت جدا بكلماتك و بزيارتك.. تحياتي و احترامي

      حذف
  7. احمد حبيبي صديقي العزيز بجد انا سعيد جدا اني ليا صديق زيك مكافح وبموهبتك النادره شرفني جدا انك تذكر اسمي ده شيء يسعدني بجد

    ردحذف
    الردود
    1. ربنا يخليك يا شريف،انا و الله أسعد بمعرفتك و بصداقتك و ربنا يديم المودة بينا..والأكيد انك تستحق أكتر بكتير من مجرد ذكرك بكلمتين لأنك أعلى و أرقى من هذا بكثير..محبتي و تحياتي

      حذف
  8. أنا من أول تدوينة قريتها ليك عرفت إنك شخص مش عادي .. موهوب و مش هاوي زي ما انت فاكر .. و صدقني لو بكرة لقيت في المكتبة كتاب ليك مثلا و ثمنه غالي أوي عليا هحوش عشان أشتريه :)

    لكن كله كوم و إنك تكتب عن نفسك حاجة تانية .. فعلا سعيدة إني اتعرفت بيك . و بمدونتك ..
    بس بجد أنا بتمنى إنك حتى بعد الحملة و الإجازة تستمر في التدوين زي دلوقت لإن لو حصل العكس ، هتوحشني مدونتك و تدويناتك فعلا ..
    و دة مش مجاملة .. دة إحساس حقيقي

    و جميلة صراحتك و صدقك مع نفسك قبل ما يبقى مع قراءك :))
    و معجبة بشخصيتك أوي بعدما اتعرفت عليك أكتر هنا ..

    زي العادة مستنية جديدك و تأكد إن فعلا كلما أدخل هنا مش بخرج كدة إيدي فاضية
    لإني ببقى على الأقل اتعلمت حاجة واحدة
    و زي ما انت فاهم التعليم العمومي أي كلام
    فبجد بتمنى تستمر .. لإنك من المدونين اللي بفتخر إني بشترك معاهم في صفة مدون

    ردحذف
    الردود
    1. أستاذة ايمان،كلماتك أسعدتني جدا و شجعتني جدا،و أعتز بها جدا،و الأكيد أني الأسعد بمعرفتك و هي شرف كبير جدا لي،و اتمنى اني أقدر استمر بعد شهر التدوين ده،لأن السعادة مش هتبقى في الكتابة بقدر ما هتكون في متابعة الكتابات الرائعة و الراقية جدا لأصدقائي هنا و انت ممن على رأسهم،..دايما بأقول أن الادعاء يحرمك من متعة النجاح لأنه يجني مدح و ثناء لشخص أخر غيرك،..سعدت و تشرفت جدا بوجودك..تحياتي و احترامي

      حذف
  9. هابدا من الآخر بالنسبة لسؤالك عن اختلاف احساسي بعد نشر الكتاب لا مفيش اي فرق الاول يمكن كنت فرحان لدرجة كانت مخوفاني امسكه علشان مكرمشهوش لكن بعدين اكتشفت انها خطوة عادية و مش دليل يعني اني مبدع و لا حاجة بالنسبة للنقد يا ريت يا سيدي حد ينقدني على الاقل احس انه قرا الكتاب بتمعن و لقي فيه مواضع قوة او ضعف
    على فكرة انا بحب مجذوب السماء اوي كمان و شايفها قريبة فعلا منك
    انا سعيد بحملة التدوين و بشكر الدكتورة شيرين انها خلتك ترجع تدون تاني
    انا سعيد و فخور بمعرفتك
    تحياتي ليك

    ردحذف
    الردود
    1. أشكرك دكتور مصطفي على كلماتك الجميلة، و من يوم عرفتك تشرفت و سعدت جدا بمعرفتك، و استمتعت جدا بكتاباتك، واتمنى لك التوفيق دايما و اتمنى أن ارى كتبك قد ملأت أوجة المكتبات..تحياتي و احترامي

      حذف
  10. انت عارف طبعا انى مش هعرف أكتب حاجة تعبر عن سعادتى واستمتاعى بقراءة كل تدوينة ليك .. ساعات ببتسم زى الهبلة وأنا بقرأ تدوينة مضحكةممتعة لحد ما هيقولوا عليا اتجننت وهبقى فى مستشفى المجانين قريب .. وساعات بقعد متنحة شوية بعد ما قرأت من كتر ما الكلام معبر وصادق ومسنى من جوه

    دايما كلامك ممتع .. وبخصوص بنت الحلال مش تقلق ..أم سحلول بتدرس عرضك للجواز .. وشكلك كده هتدبس وتخش دنيا العفاريت

    ردحذف
    الردود
    1. أستاذة مروة،المرة دي عبرتي بما فيه الكفاية جدا و يزيد ،،..أسعدتني كلماتك جدا جدا و تشرفت بها جدا،و انت تعلمين مقدار اعجابي و احترامي لكل حرف تكتبيه..يمكن يكون الفرج على ايدك، و له ثواب كبير اللي يوفق راسين في الحلال زي ما انتي عارفة !!
      ..أشكرك جدا..تحياتي

      حذف
  11. انا دى اول زياره بس شكلى هفضل هنا
    اصل بحب الفلسفه بقي :))) وكفايه المدونه اسمها وجع الفلسفه
    تصدق فكرت في نفس السؤال لو الواحد اتوجع من فلسفته هيعمل ايه ويروح لانى دكتور :))

    الاسئله كانت صادقه وفيها ثقه وفيها جزء من فلسفتك وتجاربك وطباعك حتى في الحياه

    انا استمتعت جدااا فوق الوصف مملتش وقولت كده كتير يعنى :))

    سعدت بالمرور ان شاء الله مش اخر زياره يعنى :)

    ردحذف
    الردود
    1. رنا ، أشكرك جدا جدا على كلماتك الجميلة و على زيارتك التي أسعدتني جدا و شرفتني جدا جدا..و يارب دايما كتاباتي تنال قبولك..تحياتي

      حذف
  12. تشرفت بمعرفتك أستاذ أحمد

    وسعيدة بتواجدك الجميل بننا
    اسم مدونتك لفت انتباهي جدا واليوم ها انا عرفت ما يعنيه
    مدونتك رغم حداثة معرفتي بها إلا أنني أجد فيها عمق
    و كلمة صادقة لها هدف سامي

    بالنسبة للسؤال الأخير
    سأجيب عليه بعد النشر

    ردحذف
    الردود
    1. أشكرك استاذة زينة،والاكيد اني تشرفت و سعدت بمعرفتك أكثر،اشكرك على كلماتك الجميلة واتمنى انا تنال كتابتي دوما قبولك،تحياتي

      حذف
  13. انت انسان رائع يا احمد

    ربنا يوفقك ويكرمك ويسعدك فى حياتك

    وان غبت لظروف عن التدوين لاتنسى انها فترة وتعود

    ولكن لاتتركة نهائى

    اتمنى لك كل خير

    مع خالص تحياتى

    ردحذف
    الردود
    1. أشكرك استاذ تامر على كلماتك الجميلة في حقي، واتمنى دوما ان اكون عند حسن ظنك،وبإذن الله لن اتركه نهائي و اتمنى ان تساعدني الظروف على الاستمرار...سعدت و تشرفت جدا بزيارتك، محبتي و تحياتي

      حذف
  14. من اول اسم المدونة لاسم البوست
    للاجابات تحفة بجد
    انت حالة مش بتحصل كتير
    استمتعت جدا جدا بوجودى هنا

    ردحذف
    الردود
    1. أشكرك استاذة أية،أولا على زيارتك التي شرفتني و اسعدتني جدا، وثانيا على أنك صاحبة فكرة هذه التدوينة..تحياتي

      حذف
  15. تحياتى وتقديرى لشخصك الكريم يا احمد
    لا اعلم لماذا عندما قرأت تعريفك لنفسك استحضرت الاستاذ / عباس محمود العقاد فى مخيلتى
    جايز يكون علشان عدم اكمال الدراسة .
    جايز يكون علشان ثقافتك الواسعه.
    لكن فعلا اسلوبك رائع وشرفت بمعرفتك
    تقبل تحياتى

    ردحذف
    الردود
    1. مجرد أستحضارك فقط لهذا في مخيلتك يشرفني جدا،و طبعا ان اشترك مع عملاق الادب العربي في هذه النقطة فهذا شرف..و لكن طبعا لا مقارنة في أي جوانب اخرى !!
      ...أشكرك شكرا جزيلا استاذ محمد،و كل الشرف لي بمعرفتك و بزيارتك لمدونتي..محبتي و احترامي و تحياتي

      حذف
    2. على فكرة يا احمد انا اكتر حاجه بكرهها فى حياتى الرسميات مع انى مخنوق بيها فى شغلى
      فلو لاحظت هتلاقينى عمرى ما قولتلك يا استاذ مع انك تستحق اكتر منها
      فارجوك انت وباقى اسرتى الكبيره فى التدوين , بلاش استاذ دى علشان بتخنقنى هههههههههههههه

      حذف
    3. أولا شكرا جزيلا يا محمد ،و انا لا استحق كلمة استاذ،لأني لست استاذ أما انت فنعم !..و لكن هنمشيها محمد..و ربنا ما يجيب خنقة!!
      ..
      على فكرة دي مش رسميات،أنا دايما احب اعطي الشخص قدره- على قدر المستطاع طبعا- حتى مع أصحابي أو اللي كانوا زمايلي ، نادر أما انده عليهم بإسمهم حاف، المهندس أقوله يا باشمهندس ،و المدرس يا استاذ، و المحامي يا متر..و كدة..أشكرك على تعقيبك..تحياتي

      حذف
  16. "سلمى فتحي و مدونتها افرد جناحك،بحس مع أفكارها الرائعة اني بأطير، و تشجعها عمري أبدا ما هأوفي له حقه" ..

    أنا مبسوطة قوي من الكلام ده بقى :) .. طايرة بقى وفاردة جناحي كمان أهوه .. والردود ع الأسئلة .. فعلا مميزة وصادقة .. تشجيعي ولا حاجة بالمقارنة بتشجيعك ..

    ربنا يديم المعرفة الطيبة :)

    ردحذف
    الردود
    1. الأكيد يا سلمى انك تستحقي أكتر من كدة لكن هي الخيبة في القدرة على اعطاء كل شخص قدره من الثناء و الاعجاب..أو التعبير عنه بالأحرى..
      و زي ما قلتي ربنا يديم المعرفة الطيبة، ويارب دايما في نجاح و تألق و سعادة..تحياتي

      حذف
  17. صباح المكان وما حوى
    الأستاذ الراقي
    " أحمـد صـالح "
    :
    حقيقةً سعدتُ وأنا أتجول بين سطورك ،
    فلك شخصية جميلة رقيقة بسيطة
    فلا أجمل من البساطة حين تُعبِرنا !
    ولا أجمل من حديث نفسك ، حين يعبر كل الأرواح !
    لحرفك باع فلا تهمله ,
    تحية ودعاء .. بدوام الألق
    كل التقدير .

    ..
    ..
    ..

    أحمــ سعيـد ــد

    ردحذف
    الردود
    1. أستاذ أحمد،أشكرك شكرا جزيلا على كلماتك الجميلة جدا في حقى و هذا شرف و سعادة كبيرة جدا لي..
      سعدت و تشرفت بكلماتك و بوجودك هنا..كل التحية و الاحترام

      حذف
  18. صراحة اسلوبك عاجبني جدا فى الكتابة وسبق وقولتلك حتى تعليقك على اى تدوينة ليه اسلوبه الخاص المميز :) .. بس عاوزة اعرف بقا انهى تعليقاتك وانهي تعليقات رحاب :D :D
    بسيــطـة جدا حياتك واحسن حاجة انك مش بتحاول تتجمل .. بتتكلم بطبيعتك ..
    وعلى فكرة انا رأيي انك مش مجرد هاوي انا رأيي كمان انك محترف :)

    وسعيدة بوجودى هنا ^_^

    ردحذف
    الردود
    1. أشكرك حنان على كلماتك الجميلة في حقي..
      هي رحاب عملتها مرة واحدة و علقت على مدونة باسمي بس رجعت وضحت الأمر...و ما عادتش بتعملها الا عندي أنا بس !! رغم ان كل واحد فينا مسجل دخول على متصفح بس هي مصممة ان متصفحي أحسن و نغير المتصفحات و ترجعى برضة لنفس الحجة !
      ..
      عارفة هو مش عارف عيب و لا ميزة فيا ، ان احيانا أجمل اراءي تخرج عندما أعلق على أراء الأخرين !!
      ..
      سعدت و تشرفت بوجودك جدا..تحياتي

      حذف
  19. عجبتنى اووووووووووووى صراحتك وطريقة كلامك المباشرة اللى مش فيها مجاملة
    وفى رأى انا شخصيا انت مش بس هاوى لا أنت محترف وبدرجة كبيرة جدا ما شاء الله وليك اسلوب يميزك لوحدك
    بس فى حاجة بقى مش فاهماها فى اجابة السؤال صف مدونتك قولت ما يصحش:D:D:D
    تحياتى وسعيدة بوجودى هنا ومزيد من الإبداع:)))

    ردحذف
    الردود
    1. أشكرك أميرة على كلماتك الجميلة و على رأيك في المدونة و على وصفك لي بالمحترف و ده أكيد رفع من روحي المعنوية..
      ..
      أنا أما أوصف نفسي ده حقكم عليا لأن معظمكم ما يعرفنيش ولازم أكون أمين و صادق في اللي أقوله..لكن المدونة كلكم شايفنها و عارفنها و الأصح ان انتم اللي توصفوها و أسمع أراءكم فيها و نقدكم ليها..و عشان كدة قلت ما يصحش !!
      ..
      سعيد أكتر بوجودك هنا يا أميرة..و بأكون سعيد أكتر و أكتر و أنا في مدونتك..تحياتي

      حذف
  20. مساء النور رغم أنك لم تذكرني في تتبعك وهذا لأنك جديد الإنضمام لمدونتي
    لكن كان لي شرف التعرف عنك من خلال هذه الحوارية ...دمت وطابت أوقاتك .

    ردحذف
  21. مساء/صباح الانوار و الازهار أستاذتي خديجة،أستاذتي هذا و الله سهو غير مقصود،فانا بجانب استمتاعي بكتاباتك الرائعة اتعلم منك كل مرة شئ جديد،فسامحيني على سهوي و تقبلي اعتذاري..و أشكرك على كلماتك الجميلة هذه و على مرورك الذي أسعدني و شرفني جدا جدا..تحياتي و احترامي

    ردحذف
    الردود
    1. مساء النور أستاذ أحمد هي كانت من باب المزاح ليس إلا فمجال الأدب والتدوين فسيح جدا
      ولا يسعنا لملمة كل ما في هذا العالم الرحب ، حفظك الله ورعاك ومواصلة نحو الرقي
      جميل جدا أن نتصرف بطبيعتنا فهي الأجمل والأنقى وأنا أجدك ذاك المرء الذي يحمل بداخله انسان ...كن كما أنت فقط فمايشدني لكتاباتك هي العفوية وهذا دليل على شفافية الروح ...تحيتي الليونية .

      حذف
  22. اهلا بيك احمد وسعيده جدا لعفويتك وصراحتك وصدقك في تعريفنا بنفسك.

    لفتت نظري عبارة - ((استفزني خد مني أحلى كلام !! ولا استطيع التعبير بالكتابة بقدر ما استطيع التعبير بالكلام.))
    ما شاء الله ...
    عكسك انا ...اعبر بالكتابه اكتر من الكلام بكتير :))

    بالتوفيق وربنا يحققلك كل اللي بتحلم بيه ...وان شاء الله يرزقك ببنت الحلال اللي تسعدك .

    ردحذف
  23. أشكرك أستاذة سهير شكرا جزيلا..
    عادة الادعاء يجلب الاعجاب لشخص اخر غيرنا، و لكن الصدق و الصراحة مردودها لنا نحن و ليس لمن ندعيهم..
    سبحان الله ، كل انسان وضع الله سبحانه و تعالى نقاط تميزه قد نتشابه أو نختلف فيها..
    أشكرك استاذة سهير على امنياتك الطيبة لي،و لك مني كل الامنيات بالتوفيق و التألق و النجاح و السعادة لك و لكل افراد اسرتك الكريمة،و لكل من تحبين و لكل من يحبك..تحياتي و احترامي.

    ردحذف

فضفض و قول اللي في ضميرك
مشتاق صديقك لأي قول