الخميس، سبتمبر 12، 2013

إنتي

بياعين لكل شئ فى الحياة
مذوقين الكلام فاكرينه يغريكي
بيوصفولك ألف طريق للنجاة
ومش بعيد فيها الهلاك ليكي
طالبين لكل شئ يحلالهم
ويدعوا إنه أعز أمانيكي
عطاشى وقلبهم أرض خراب
ولا قدر واحد يرتوي بمعانيكي
..
راح فين مين قال زمـــان
هأعمَّر كل الخراب واعلـّيكي
وهأصون ترابك والهوا الطاير
وأبوس سماكي وغيطانك وحواريكي
قوليلي هو خلفك طلع خايب
ولا العقوق رد جميلهم ليكي
طز في سواعد بتتأمر وتتكبر
رازق الخلايق بجوده يغنيكي
..
مين يدعــي إنه كل النــاس
وإنه تحـــت أمر معــاليكي
كداب ما أختشـــى من ربــه
مفضوح بما يفعـــــله فيكــي
نفــاقه غاية وكمــان وسيــلة
وخداعه فاكره بسهولة يطويكي
وفضيحته إنتي بالطيبة ستراها
ضناكي-قلتي- وما هان عليكي
..
أنا الأدهم وأنا الزناتي خليفة
أنا كل قصة أوغنوة تسليكي
أنا العاشق اللي عشقه متداري
من غيري يقدر بحبه يرويكي
أنا فوق ربوعك واقف ديدبان
ومحوط بالوريد حدود أراضيكي
أنا التغريــدة قالهــا الطيـــر
ورددها وكل مُناه يرضيكي
..
أنا المؤمن بألوانك وأشجارك
أنا التابع لنظراتك وخطاويكي
أنا الغلبان وأنا اللي طينك بناه
وانا اللي قلبه نبضه حكاويكي
أنا إللي صدره كان مخنوق
وكان دواه أنفاس عصاريكي
إديني إيدك يا غالية وقولي أه
بايع أنا كل حيــاتي وشاريكي.
..
أنا اللــي زنـده كـان صـــامد
ولا إستسلم لأغلال أعـاديكي
أنا اللي جبهتــــه برتها النار
ولا ركعت وقال بالباقي أفديكي
أنا اللي دمــــه كان فرحـــان
لما سال يجري في قناويكي
وقال موتة بألف حيـــاة
فين الحياة في شئ يخزيكي؟
..

هناك 6 تعليقات:

  1. حلو اوي تعبير دمه كان فرحان جديد

    ردحذف
    الردود
    1. أشكرك أستاذتنا
      دايما بأسعد وبأتشرف بوجودك.
      إحترامي.

      حذف
  2. انا النجم اللى ساطع فوق تراب ارضك
    ياللى الفؤاد والروح دايما تدوب فيكى
    ـــــــــــــــ
    جميل بوح قلمك الراقى يااحمد
    احسنت المقال
    مودتى واعجابى بما تقدم

    ردحذف
    الردود
    1. أشكرك سومه، دا بعض ما عندكم.
      كل الود والتحية.

      حذف
  3. أنا الأدهم وأنا الزناتي خليفة
    أنا كل قصة أوغنوة تسليكي
    أنا العاشق اللي عشقه متداري
    من غيري يقدر بحبه يرويكي
    أنا فوق ربوعك واقف ديدبان
    ومحوط بالوريد حدود أراضيكي
    أنا التغريــدة قالهــا الطيـــر
    ورددها وكل مُناه يرضيكي

    جميييييييييييييييل

    ردحذف

فضفض و قول اللي في ضميرك
مشتاق صديقك لأي قول