حقيقة

لسَّانا بندور على طـُروف الخيط
وغيرنا غزل مليون جلابية وشال


ولسَّانا سنين بنبي في أول حيط
وغيرنا عُمْرانه قارب سماه وطال


أهل بلاغة والعقل منـَّا حـَويط
وهما الأغبيا علم وصناعة ومال


والراسِي فينا وقت الهَيَافة يزٍيط
كأنه ما كان قال بلاها لِعب عيال

متفرقة خطاوينا والبحر بينَّا غويط
أما القلوب فما فيش ما بينها وصال

وإيه تنتظر م إللي مِشـِي تخبيط
ولا في يوم فكر يعـْدِل إللي مَال

بالعقل يا خِلي ودرَاعك لو نشيط
يصْبَح يَسير إللي إفـْتكرته مُحال

بلقمة تقسمها مع كل فم بسيط
ببسمة محبوبة تملا الليالي آمال

بطبطبة روحك على اللي همه محيط
وبسندة من كتفك للي حمله إتقال

لو كنت فاكر حلها فهْلوة وتنطيط
أو نوم في العسل وهيحلها الحلال

أو شفتها فـُلة مش محتاجة تزبيط
وإنها جامدة وحالها عَال العـَال

فداري خيابتك وإتلِهي يا عبيط
كيد العدو يلزمه يا حِيلتها رجال!
..