الثلاثاء، ديسمبر 10، 2013

خدمة عملاء


-        سلوى منصور، مساء الخير يا فندم!
-        (إية الصوت السكر ده!) مساء الخير
-        أتشرف بحضرتك
-        معاكي (يا سلام لو بجد!) محمد يونس!
-        إستفسار حضرتك عن نفس الرقم أستاذ محمد؟
-        اه عن نفس الرقم
-        اتفضل يا فندم إية المشكلة؟
-        (أنتِ المشكلة لو تعلمين!) هو بس أنا، لأ مش أنا دا عمي إللي هو صاحب الرقم كان مشترك في باقة وميعاد الإشتراك عدى ومش عارف يعيد تشغيل الباقة تاني إزاي!
-        بسيطة يا فندم...(بسيطة مين دا واضح إنك عقدة!)..حضرتك مبلغ إشتراك الباقة 80 جنية و80 قرش بضريبة المبيعات (على كدة يا ترى مهرك كام!) هتقوم حضرتك بشحن مبلغ يتعدى مبلغ اشتراك الباقة، وليكن 81 جنية، وهتقوم حضرتك بالإتصال على رقم 858 وتختار الأوبشن..(يا ريت أنا بس إللي له الحق يختار!)..رقم واحد..(أكيد رقم واحد مُفتخر!) إللي هو تجديد الباقة، وهتتجد الباقة مع حضرتك يا فندم!
-        يعني..(أهو أطول في الحوار شوية!) أشحن بمبلغ فوق الـ 80 جنية 80 قرش وأتصل بعدها على 858 وأختار الأوبشن نمبر ون، والباكيدج هتتجدد معايا؟!
-        تمام يا فندم كدة.
-        (أسأل عن إية؟!، أسأل عن إية؟!، أسأل عن إية؟!)
-        عند حضرتك استفسار تاني يا فندم؟
-        (يا دي الورطة!، أسأل عن إية؟!، ... أيوة!) أيوة كان عندي فلاشة النت مش عارف أعرف معلومات الباقة إزاي، يعني إستهلاكي أد إية، وفاضل أد إية، وميعاد التجديد وكدة يعني! (قول يا جميل قول!)
-        حضرتك إنت تقدر تدخل على الويب سايت بتاعنا من الرابط الموجود في البوكس إللي بيظهر لحضرتك أول ما تفتح الجهاز، وكمان بتلاقي في المينيو بار فوق كلمة الأكونت أو الحساب وتقدر من خلاله حضرتك تعرف إستهلاك الباقة ورابط الويب سايت لأكونت حضرتك موجود في الصفحة دي!
-        (باينها كدة أخر!) تمام كدة!
-        في أي استفسار عند حضرتك تاني يا افندم؟
-        (ما بدهاش بقى!) لا ميرسي جداً يا سلوى..مش سلوى برضو؟!
-        أيوة يا فندم! شكرا لإتصالك بفو...
-        (أيوة هي دي!) ماعلهش بس عندي استفسار أخير!
-        اتفضل يا فندم
-        الإستفسار المرة دي عن رقمي أنا!
-        ورقم حضرتك كام يا فندم؟
-        (هي دي) الرقم زيرو واحد زيرو زيرو زيرو...
-        وإية استفسار حضرتك يا فندم؟
-        كنت بس عاوز أتأكد من بيانات الخط عشان أتأكد إن الخط بإسمي، لأني كنت عاوز أضيف خدمة معينة ومطلوب لها البيانات!
-        تحت أمر حضرتك يا فندم!
-        (يا تصيب يا تخيب!) الخط بإسم محمد يونس مصطفي السعيد، صح؟
-        مضبوط يا فندم!
-        رقم البطاقة 0122142845785 ، صح؟
-        تمام يا فندم!
-        وتاريخ الميلاد 25 مارس 1984 ، مظبوط؟
-        منا..مظبوط (إتلخبطت!، وقعت ولا إية؟!) يا فندم!
-        حاصل على بكالوريس تربية، وشغال مُدرِّس وساكن في شبرا!
-        تمام(بتضحك والنعمة!) يا فندم!
-        (بيتهيألي كدة خلاص!)
-        في (شكلها كاتمة الضحكة!) عند حضرتك استفسار تاني بعد ما اتأكدت من بيانات الخط؟
-        (دايما في أمل!) ما اظنش!
-        شكراً يا فندم على إتصالك بفو....
-        (يا صابت يا خابت!) ما علهش بس طلب اخير، يا ريت تبعتيلي رسالة، قصدي رسايل ضبط خدمة النت لأنها اتمسحت من على الموبايل، عشان أقدر أدخل على النت!
-        هأبعت لحضرتك رسايل ضبط الخدمة على موبايلك. (في شبه ضحكة) في أي استفسار تاني عند حضرتك يا فندم؟!
-        (الوداع يا قمر!) لا مع السلامة، ميرسي ليكي..منتظر الرسالة...قصدي الرسايل!
-        شكرا لإتصالك بفودا (بتمطيها عاوزاني أقاطعك تاني ولا إية؟) فون!
..
بعد انتهاء الوردية وصلته رسالة ضبط قلبه!

هناك 8 تعليقات:

  1. الردود
    1. من الواقع إزاي وهي ما كنش إسمها سلوى ولا كان هو محمد! :D
      ..
      دي من وحي مكالمات خدمة العملاء بس حبيت أضيف لها فكرة جديدة، حصلت بقى ولا لأ، الله أعلم!

      حذف
  2. جميلة جدا
    بس صاحبنا هنا مؤدب
    فيه ناس أعوذ بالله
    ضحكت بجد شكرا :))
    تحياتى المعطرة

    ردحذف
  3. هذا المكان معرض للمعاكسات دائما ودائما العميل على حق فلاسلوب لابد ان يكون جيدا مهما كانت سخافة العميل
    اسلوب راقى ممتع تحياتى اخى العزيز
    ابوداود

    ردحذف
    الردود
    1. بالفعل صحيح ما قلت أبو داود.
      أسعد دوماً بوجودك
      كل الود والتحية.

      حذف

فضفض و قول اللي في ضميرك
مشتاق صديقك لأي قول