طفولة

أيوة صحيح

سافرت طفولتي من زمان

أو ربما خبيتها انا

ونسيت فين المكان

أما الغريب في الأمر

يا إخوان

هو إنها بتزور شبابي

من آن لآن

تقدر تجيلي لحد عندي

أما انا ما املكلهاش عنوان

واضح بأن المسألة

مش مجرد عمر كان

أو حياة بتمر وبعد مدة

نقول فات الأوان

كل ثانية في عمرنا

موضوعة في الحسبان

اللي عدى وانكشف منها

وحِمْلُه قدمنا ظهر وبان

واللي لسة في علم غيبه

وقت كشفه لسة ما حان

عمرنا الكانن في بير ذواتنا

ما يقتله تجاهل ولا نسيان

تلاقيه كدة متكوم

في زواية من الوجدان

ما يحكمه حاكم

ولا يكبته سجان

يوم وعشته من ميت سنة

تلاقيه يظهر كدة فجأة

ولا رئيس الجان

يرسم فوق الشفايف بسمة

أو تسيل له من العيون

الدموع أطنان
سبحان اللي خلق
وبرى دا الإنسان
يشيل بداخله من الحمول
ما يطيش لها مليون ميزان
قادر يشوف الدنيا حواليه
ويلفها بسهولها والوديان
ساعات تكون سودة
وساعات تكون ألوان
لكن هيجي في يوم
وينام بكل رضاه
في ركن من الأركان
جواه ألف حياة
لكن يا خوفي يكون
مقضها نعسان
ما تروي منه الروح
ولا يوم يقول شبعان
لكن أمور عدة
ياريته بس يكون
واضعها في الحسبان
أولها
خروجه من الدنيا
زي الدخول عريان
وتانيها إن أعماله
مسطورة في كتابه
يخطها الملكــان
وتالتها إن مافيش
بينه وبين الموت
ميثاق وعهد أمان!
..
...