سمك، بصل، ويوسفنــدي!

يا مصـر مش غلطتك

دي غلطة الحلواني

بناكي حلوة ومدملكــة

وكل مافيكي أغراني

وإزاي أحــوش أنا

نفســي الجعانــة

عن بطـــة متحمرة

ومتمطعــة قدامــي

دا أنا لا البعيد نـَبـِــي

ولا الصَحابة خِلانــي

ونسيت حقيقــة إني

هيجي يوم واتدفـــن

وحدي في أكفانـــي

ولا في يوم أنـْكـَـر

فِعـْلِي المُشين وُجْدَاني

ماهو أصل بانيكــي

انا كمان بنانــي

عَلِّمنــي أصل اللـَوَع

وعلى الفـَهْلَوة ربَّاني

فلا قلت يوم عيب إخـْتِشِي

وإنقِفلي يا أجْفـَانــي

غـَض البصر ده فضيلة

بروحي أختارهــا

وأزرعها في كـَياني

لكن صحيح كما تعلمون

وأظنكم

هتعذروني يا إخواني

إن الشيطان شاطــر

سحب رجُولي بدَحْلَبْتـهُ

وقـَدر يـِجَـنّد عيوني ووِدَاني

ومشيت أنا خلـْفــه

طول الطريق عِمْيَانــي

والكدب عارفه خيبة

وكمان جناية ســودة

ما يرتكبها لسانــي

أما الصراحــة بقى

ويبقى العيب عدَّانــي

انا قلتله على جثتــي

يا شوشو مش رايح

وفرحت لما ودَّانـــي!

..

يا مصـــر

يا تعبانــي ومغلبانــي

وملخبطالي عقلــي

ومشتتالي كيانــي

ناسِك من الوش صــورة

ومن القـَفـَا شكل تانــي

كتير يقولوا والعيون شَــرار

شُوفوا الفجور النسواني

دا لِبْس ولا لبس الكُفــار

إشي محزق وإشي قصير

يا مولعين فيا نيرانــي

أهرب انا منكم على فين

ما تلبسوا ما يطفي بركانـي

والكلمة طالعة بحُرْقـــة

يا اختي غـَطَّي عورتك

بلبس إيمانـــي

والنظرة يالا العجـــب

فيها الشهوة بتصرخ

يا ريته بكينــــي

أو لبس تحتانـــي!

...

يامصـــر

يا سايقـــة العــوج

قصدك كدة يعنـــي

تشعللي فيا جنانــي

كدابينك إتنغنغـــوا

وأنا إللـــي

بمنجاة الصدق معشمانـي

عارفني عبيـــط

وطـُوعي ليكــي

أول حاجة مخيبانــي

لكن بأقول حبــك

عن كتير من الدنيا دي

شَبَّعنــي وكفانــي

رغم الكـُتـَار اللي قالــوا

إن حبك أصبح مزيــف

زي الجنية البَرَّانـِــي

منظر وهيئة فلـــوس

ومايشتريش قرطاس سوداني

وقلت أنا من النهادرة

شغـَّال في الخباثة حرامــي

مركز وقيمة وربح مجانــي

سلم كهربا

لباب السما يوصلني

وفانوس سحـــري

لتحقيق الأمانـــي

دِيتْهَا بس يوميـــن

أفـَنْجَر على الغـَجَر قِرشين

وألبس بدلة أرمانــي

وأبقــى مَثـَل أعْلـــى

ونُص قـُـوم البلــد

يتمنوا يبقوا أعوانـــي

ماهــو اصلنــا

نسينا مـوال ع الأصل دور

ورقصنا ورا فلوس الغواني!

...

يا مصــر يا خدعاني

أنا إبن بطنــك

وليه إنتي نكرانــي

وبين ديابــة

انتي برضة أمهــم

على الرصيف رمياني

مكسوفة من نسبــي
وانتي بكدة كسفاني
عاوزة تمحي بنا الصلة

مفكرة إنك كــدة

عن الخطر بعدانـــي

قاموا كتير غيــرك

لقفوني من الشارع

وتولوا إسكانــي

قالولي إنضم لينــا

والفرصة دي مجانــي

دي شغلة ملبــن

والصفقـــة من دول

يا دوب تاخد ثوانــي

بس أوعك في يوم تعض فينا

وتقول رجعولي زمانـــي

تخسر كتير يا صاحبي

وما ترحمك كرابيج سجَّانــي

إللي دخل فِرْقتـــي

يتمختر على زَمْـــري

ويغنـــي ألحانـــي

جربت انا وقلـــت

من النهاردة فــرح

وياويله إللي في يوم بكَّانـي

لكن أنا اللي بكيــت

واتهدت من الدموع أركانــي

ساعة مافطـَّمونــي

بإن لحمك يا أمــي

هو اللي أغـْنَانـِــي

مش فاكر اللي حصــل

لكن صحيت ما اعرفش إمتى

لاقيتني مشلـــول

مبتورة أوصالـــي

أخرس وأهْتـم

من غير لساني وسنانــي!

..